A CIG-Ensino denuncia que o Concello de Vigo ten a pretensión de derrubar o edificio da Escola Infantil Municipal Santa Marta porque “estorba” á intervención urbanística do Barrio da Cura e do Túnel da Porta do Sol.

Así o manifestou o concelleiro de Educación de Vigo no pleno do Consello Escolar Municipal do pasado 10 de febreiro, no que FOANPAS e a CIG-Ensino reclamaron a súa preocupación polas traballadoras e os nenos e nenas da escola.

“A EDUCACIÓN NON É A PRIORIDADE”

Por outra banda, a CIG-Ensino sostén que o concelleiro non anunciou ao Consello que se pretende trasladar as dúas aulas de 1 e 2 anos da escola e eliminar a de 0 anos, reducindo así o servizo e poñendo en perigo a continuidade da escola. “Unha vez máis, a educación non é a prioridade”, reivindican dende o sindicato.

Ademais, a CIG-Ensino defende que a reubicación da escola é un erro, xa que “a escola faise máis necesaria que nunca e por iso o Concello debería prever a súa ampliación, pois a reurbanización residencial fará aumentar a necesidade de prazas infantís como a superficie na contorna”.