Os Parques Infantís de Tui permanecen pechados e precintados polo que non se pode acceder aos mesmos. A pesar de que a nova normalidade permite a súa apertura, a falta de protocolos consistentes da Xunta e a imposibilidade de garantir a seguridade sanitaria da rapazada, obrigou ao Concello de Tui a manter pechadas estas instalacións.

Nos próximos días instalaranse columnas de hidroxel e cartelería coa normativa nos accesos aos parques máis frecuentados, “pero o control de aforos e a desinfección que tería que levarse a cabo non é asumible para o Concello”, indica o consistorio nun comunicado. 

De feito, o alcalde de Tui, Enrique Cabaleiro, sinala que “a competencia de reapertura é municipal pero se fixan uns criterios de índole sanitaria que cumprilos por parte dos concellos é sumamente difícil e suporían un custe inasumible”.  

SANCIÓNS

De feito, o alcalde denuncia que este luns houbo persoas que romperon os precintos existentes e accederon a estas instalacións, unha conducta, di, “que poderá ser sancionada pola Policía Local, xa que polo momento non se poden usar”. 

“Seguimos nunha situación de alerta sanitaria, debemos extremar as precaucións e até que o concello entenda que non se dan as condicións necesarias ou os parques non dispoñen dos elementos precisos para a súa utilización non se poden nin se deben empregar”, suliñou.

Por iso, insistiu na necesidade de que a veciñanza sexa estrita no cumprimento destas normas e anunciou unha vixilancia constante e permanente dos parques. “Neste momento a actuación municipal débese guiar pola prudencia e a do conxunto dos veciños a responsabilidade, apunta o alcalde de Tui”. Esta decisión coincide tamén coa doutros concellos, como Vigo, que abrirá só parcialmente, algúns parques nos que poida garantizar as condicións sanitarias dos máis pequenos.