O xulgado de instrución número 2 de Cangas (Pontevedra) ditou auto de ingreso en prisión para o veciño desta localidade que foi detido este xoves tras atacar, supostamente, cun machete á súa parella.

Concretamente, ordenou o ingreso en prisión provisional, comunicada e sen fianza, para o home, investigado por un suposto delito de tentativa de homicidio e outro de violencia de xénero, segundo confirmaron fontes do Tribunal Superior de Xustiza de Galicia (TSXG).

Os feitos ocorreron á primeira hora da tarde deste xoves nun domicilio de Cangas. O investigado supostamente atacou cun machete á súa parella, unha muller de 32 anos de idade, que foi trasladada con feridas graves ao Hospital Álvaro Cunqueiro de Vigo.

A Garda Civil localizou ao presunto autor das feitos horas máis tarde en Xinzo de Limia (Ourense). Así, o home foi detido cando ía conducindo e se dispuña a acceder á autovía A-52 nesta localidade.