O alcalde de Vigo, Abel Caballero, destacou o “éxito” do programa municipal de rehabilitación de vivendas para o seu alugueiro a prezos accesibles, que desde a súa posta en marcha suma seis beneficiarios. O Concello estuda agora outras 16 solicitudes. Tras presentar o programa en marzo e abrir o prazo de solicitudes a mediados de ano, este mes adxudicáronse as primeiras axudas, de ata 20.000 euros, co que xa son seis os beneficiarios, por un importe total de 70.000 euros.

A estes súmanse outras 16 solicitudes que o goberno local está a estudar. O rexedor explicou que estas vivendas se destinarán ao alugueiro accesible, o que permitirá que a mocidade acceda a un piso a un prezo máis baixo e que os propietarios reformen a súa vivenda con ata 20.000 euros a fondo perdido do Concello. O goberno local asegurou que os fondos destinados ao programa son “ilimitados”, aínda que polo de agora se prevé destinar algo máis de 2,1 millóns de euros.