O subdelegado do Goberno na provincia de Pontevedra, Abel Losada, xustificou este luns as novas reducións da velocidade máxima permitida na A-55 que une O Porriño con Vigo debido a ser unha das estradas con maior sinistralidade do Estado.

“A todos nos debería parecer ben que estas medidas se presenten como un exercicio de responsabilidade”, reivindicou Losada, ao explicar que hai meses a DGT, a Garda Civil de Tráfico e Estradas do Estado lle trasladaron a necesidade de reforzar as medidas de seguridade na dita vía.

Segundo os primeiros datos, segundo apuntou nun audio enviado aos medios de comunicación, a baixada da velocidade tería permitido reducir os accidentes durante os primeiros días da súa implantación, aínda que recoñeceu que haberá que agardar a contar con máis datos.

Abel Losada aproveitou o mesmo audio para insistir na necesidade dunha autovía en túnel que conecte a A-52 con Vigo, rexeitando a “gincana” que, ao seu xuízo, suporía empregar a AP-9, xa construída, como alternativa.