A Xunta de Galicia finalmente reforzará o cadro de persoal do instituto Alexandre Bóveda de Vigo tras varias semanas de polémica e críticas por parte do claustro, que denunciara unha “redución inxustificada” dos recursos. Nun comunicado, o Goberno galego informou de que o centro contará o próximo curso cun novo profesor e cun orientador máis dos previstos inicialmente. Deste xeito, o instituto disporá de 67 profesionais, tres máis ca no curso académico 2025-2026.

Así llo trasladou o director territorial da Consellería de Educación, Ciencia, Universidades e Formación Profesional en Pontevedra, César Pérez, á directora do centro, Judit Alonso, durante unha reunión celebrada na mañá deste martes. Segundo explicou, a asignación de docentes é un proceso “vivo”, no que o departamento educativo da Xunta analiza centro por centro as necesidades de cada grupo de alumnado.

O CLAUSTRO DENUNCIARA MÁIS PRECARIEDADE E MENOS ATENCIÓN Á DIVERSIDADE

A decisión chega despois de que o claustro do instituto denunciase unha “redución inxustificada” de recursos que, ao seu xuízo, agravaba a “precariedade” do centro. Nun comunicado, o profesorado expresara o seu “fondo malestar” e reclamara á Xunta máis docentes e unha mellor atención á diversidade do alumnado. As protestas puxeron o foco na necesidade de garantir os recursos suficientes para atender as características e necesidades específicas do alumnado do Alexandre Bóveda.

O BNG ACUSA O PP DE RECORTAR NO ENSINO PÚBLICO

Precisamente este mesmo martes, o BNG de Vigo esixiulle ao Executivo autonómico que atendese as peticións formuladas polo centro. O portavoz nacionalista local, Xabier Pérez Igrexas, acusou o Goberno galego de favorecer o ensino privado-concertado en detrimento do público. “A política educativa do PP é sempre a mesma: barra libre para o ensino privado-concertado e recortes e precariedade no ensino público”, criticou.