A portavoz nacional do BNG, Ana Pontón, urxiu unha vez máis a compra do hospital Ribera Povisa de Vigo por parte da Xunta, lamentando que cando a sanidade se converte nun negocio, “as empresas que o xestionan non ven a pacientes, senón a clientes”. Así o sinalou este xoves nunha visita á cidade olívica, onde falou da polémica xurdida nas últimas semanas tras as declaracións do xa ex conselleiro delegado de Ribera Salud, que supostamente deu instrucións para rexeitar pacientes ou descartar prácticas non rendibles para a compañía.

“O que nos preguntamos é se o presidente da Xunta, Alfonso Rueda, pode garantir que a atención sanitaria de todas as persoas que están en Povisa non está condicionada por esas mesmas prácticas; que se a vida das persoas e a súa saúde está por encima do negocio”, apostilou Pontón ante os medios de comunicación. Por iso, subliñou que o Bloque levará ao Parlamento de Galicia unha serie de propostas para que as persoas da área Sanitaria de Vigo teñan garantida unha atención sanitaria na rede pública e de calidade.

Respecto diso, insistiu en pedir “transparencia”, criticando o contrato de case 100 millóns de euros anuais asinado entre o Servizo Galego de Saúde (Sergas) e Povisa que é “un segredo de Estado” ao que “non se pode acceder” para coñecer as condicións do mesmo. Ademais, os nacionalistas solicitarán unha auditoría externa para analizar como está a funcionar o hospital privado e que se clarifique se as prácticas utilizadas no hospital de Torrejón tamén se están levando a cabo en Vigo.

Por último, destacou a necesidade de que a Xunta compre Povisa para incorporalo á rede pública, co obxectivo de garantir que todos os cidadáns teñan unha atención sanitaria de calidade e nas mesmas condicións. “Trátase de defender o dereito á saúde das persoas por enriba do negocio e de que haxa transparencia”, reivindicou Ana Pontón. Na mesma liña falou o portavoz do BNG en Vigo, Xabier Pérez Igrexas, quen lamentou a “anomalía” que sofren a veciños da área de Vigo cunha sanidade “a dúas velocidades” debido ao concerto con Povisa.

Segundo el, non se garanten as mesmas prestacións asistenciais, os mesmos cocientes nin as mesmas prestacións de persoal que na rede pública. A isto engadiu a “enorme preocupación” que suscita a polémica do ex conselleiro delegado Pablo Gallart, que evidencia “que as empresas privadas fan da saúde un negocio“.