Trece monitores de 55 polgadas cada un que recollen as imaxes captadas por máis de 15 cámaras forman o videowall da nova torre de control dixital do Aeroporto de Vigo, que estrea esta tecnoloxía a nivel nacional. A idea é ofrecer un “salto cualitativo” ao control de tránsito do aeródromo, segundo reivindicou este xoves a directora de Seguridade e Xestión Operacional de Aena, Gemma Martín, que dixo que esta torre ofrece unha visión 360 graos a través das pantallas, sen necesidade de que o controlador teña que virarse.
Ademais, Martín explicou que permite unha visión “máis ampla” do campo de voo, con novas funcionalidades, xa que permite facer zoom coas cámaras en certos puntos ou ver distintas zonas da pista que desde a torre de control actual non son visibles. Aena prevé estrear a partir do 11 de xuño esta nova torre de control dixital en Peinador, que será a primeira en porse en marcha en todo o territorio nacional.
En concreto, o xestor aeroportuario espera operar inicialmente con esta tecnoloxía de 09.30 horas a 11.30 horas, un horario con pouca densidade de voos en Vigo e sempre co apoio da torre analóxica. A partir de aí, ampliará o seu uso ata implantalo por completo en 2026. Segundo a propia Gemma Martín, isto non suporá unha redución do número de controladores aéreos, senón que fará máis confortable o seu traballo grazas á tecnoloxía.
NOVA TORRE DE CONTROL
A nova torre de control dixital está situada nun edificio anexo ao aeroporto e está equipada con tecnoloxía de Skyway-Searidge, que xa foi implantada noutros aeródromos europeos. Aena e Saerco presentaron o proxecto este xoves, indicando que conta co visto e prace da Axencia Estatal de Seguridade Aérea para entrar xa na fase que permitirá empezar a control o tráfico paulatinamente. Preguntada sobre se desde Vigo no futuro poderán controlarse outros aeroportos, Martín dixo que por agora a iniciativa céntrase no control de Peinador. Tamén reivindicou a seguridade que supón esta tecnoloxía.
A directora do Aeroporto de Vigo, Ana Molés, puxo en valor o “fito” que implica para Vigo “abrir camiño” e implantar por primeira vez esta tecnoloxía en España. “Levamos moitos anos traballando neste proxecto e agora facémolo realidade. É todo un éxito”, subliñou. A xefa da torre de control do aeroporto vigués, Lesly Iglesias, explicou a operatividade da torre e destacou a mellora que supón respecto do que se facía ata agora, xa que permite ver máis aló do que alcanzan os ollos grazas a cámaras que captan imaxes de zonas ás que antes non se tiña acceso, como a cabeceira norte de Peinador que ata agora “non era visible”.
