A Xunta dotou á nova unidade de hospitalización de Saúde Mental infanto-xuvenil do Álvaro Cunqueiro dun docente con perfil de orientación tras as reivindicacións das familias de usuarios do devandito servizo.
Nun comunicado, o Goberno galego explicou que este profesional se incorporará a próxima semana e será o encargado de guiar, coordinar e acompañar ao alumnado que se atopa hospitalizado na devandita área.
Este venres, a Consellería de Educación, Ciencia, Universidades e FP abriu a vacante para cubrir ese posto, despois de que a Dirección Xeral de Ordenación e Innovación Educativa en coordinación co equipo médico desta unidade avaliasen nas últimas semanas o perfil máis apropiado para atender a este alumnado.
A maiores, a Consellería subliñou que traballa para dotar de máis medios técnicos esta unidade, prevendo enviar equipamento informático. O obxectivo é compatibilizar o seu tratamento coas clases, sempre baixo a supervisión do profesor.
O Executivo autonómico lembrou que esta unidade, creada a finais do ano pasado, dotouse inicialmente cun profesor que dependía da aula hospitalaria do Cunqueiro. “Agora, tendo en conta as distintas tipoloxías agudas de saúde mental, é necesario avanzar nunha atención máis personalizada a través de profesionais expertos que tamén conten con formación adecuada para atender os distintos casos”, destacou.
STEG
Ante esta noticia, o Sindicato de Traballadoras e Traballadores do Ensino de Galicia (STEG) celebrou este nomeamento tras “dous meses de duras negociacións e reivindicacións” por parte do devandito sindicato, da CIG, da Federación olívica de asociacións de nais e pais do alumnado de Vigo e comarca (Foanpas) e da plataforma de familias con nenos e mozos con doenzas mentais, Adoece.
Tal como explicou STEG nun comunicado, este profesional reforzará tamén a pacientes ingresados no hospital de día do Nicolás Pena.
A pesar diso, o sindicato engadiu que “seguirá loitando” para que esta praza sexa “estrutural e non provisional”, así como para que os pacientes de atención domiciliaria, tanto de saúde mental como oncolóxicos, sexan atendidos de forma presencial a medida que vaian xurdindo demandas.
Esta medida da Xunta prodúcese precisamente un día despois de que estas organizacións, xunto con traballadoras sociais do Concello de Vigo, levasen a cabo unha rolda de prensa na que anunciaron unha manifestación para esixir profesores para esta unidade de saúde mental do Cunqueiro.
