O Xulgado de Instrución número 8 de Vigo abriu auto de procesamento contra o que era director dunha asociación xuvenil de Vigo vinculada ao Opus Dei por supostos abusos sexuais continuados labores contra un menor que participaba nas actividades da entidade. Os feitos, segundo recolle o auto, remóntanse aos anos 2022 e 2023 e o procesado, próximo á familia do menor, realizaba con el funcións de ‘coach’ e asesoramento espiritual.
Os feitos, que adianta o Faro de Vigo, terían lugar en varias ocasións nas dependencias da propia asociación en Vigo e en Madrid durante unha convivencia. O sucedido foi posto en coñecemento dos tribunais polo propio acusado, aínda que ante o xuíz só o recoñeceu “parcialmente”. Non entanto, dentro das dilixencias practicadas, recolle o auto, dous representantes do Opus Dei que elaboraron un expediente ao home declararon que el lles recoñeceu os abusos durante unha entrevista no marco deste expediente. O xuíz instrutor considera os feitos constitutivos dun delito continuado de abusos sexuais con penetración cometido sobre un menor, do que declara ao home como procesado, e pide unha fianza de 30.000 euros.
O OPUS DEI PIDE PERDÓN
En relación a este caso, o Opus Dei emitiu este venres un comunicado no que pide “perdón polo sucedido” e aclara que o procesado deixou de formar parte xa da entidade. O escrito recoñece que a Delegación de Noroeste da prelatura do Opus Dei tivo coñecemento das “presuntas condutas constutivas” dun delito de abuso sexual a finais de abril de 2023. De inmediato, segundo as normas de convivencia e o plan de protección e seguridade dos menores da propia entidade, puxéronse en contacto co menor e os seus pais, “co fin de ofrecerlles desde o principio apoio e asistencia”.
Así mesmo, “iniciouse unha investigación que concluíu que os feitos eran verosímiles”, apunta o Opus Dei, que acordou cos pais do menor afectado que eles levarían o caso á Fiscalía. Con todo, o procesado comunicou antes o sucedido ás autoridades. “Pedimos perdón polo sucedido e lamentamos profundamente que un fiel do Opus Dei actuase así”, recolle o comunicado.
