O presidente da Deputación de Pontevedra, Luís López, e o alcalde de Nigrán, Juan González, asinaron este xoves un convenio de colaboración polo que se destinará case un millón –o 80% da entidade provincial e o 20% da municipal– para a reforma do parque da Ramallosa.

O convenio recolle que as obras deberán estar terminadas o 30 de abril de 2025. Entre outras actuacións, contémplase a mellora de accesibilidade co deseño de itinerarios peonís e ciclistas, arranxo de pavimentos, zona axardinadas e ampliación do parque infantil, ademais de accións de eficiencia enerxética.

Por outra banda, Luís López asinou un convenio coa tenente alcalde de Mondariz, Elena Naveira, polo que investirá medio millón de euros –85% da Deputación e 15% do municipio– para a reforma do campo de fútbol e a creación dunha zona de deportes na Lagoa.