O grupo municipal do PP no Concello de Vigo instou ao goberno local a “axilizar ao máximo” a resolución das bolsas de comedor, tras constatar que o procedemento aínda non concluíu, a pesar de que acaba de comezar o curso.

O concelleiro popular Miguel Martín sinalou que a tramitación destas axudas púxose en marcha o pasado xuño e, tres meses despois, non se pechou. Esta situación, incidiu, “non é nova”, xa que en 2022 este procedemento “alongouse ata decembro”, a pesar de que o goberno local “negaba que se estivesen producindo atrasos na resolución das axudas”.

“É lamentable comprobar como, mentres as familias xa teñen todo preparado para a volta ao cole dos seus fillos, o goberno municipal non fixese os seus deberes”, sinalou Martín, afeando que Benestar Social non aprendese ” nada do ano pasado”.

O PP esixiu axilizar este procedemento e “acabar coa incerteza” de moitas familias xa que, aínda que o pago das bolsas sexa retroactivo, xérase “unha situación comprometida” para os vigueses afectados, que non saben se percibirán a axuda e “non se atreven” a mandar aos seus fillos aos servizos de comedor escolar.

Finalmente, Miguel Martín apuntou que se o retraso débese á falta de persoal, o Concello debe reforzar o persoal de Benestar Social para liquidar “en tempo e forma” a convocatoria.

FINANCIAMENTO DE ESCOLAS INFANTÍS

Por outra banda, a Xunta de Galicia saíu ao paso dunhas declaracións realizadas nunha emisora local polo alcalde, Abel Caballero, sobre o financiamento das escolas infantís. “É inaceptable e inadmisible que o alcalde engane e menta aos vigueses. É falso que a Xunta non achegue diñeiro ás gardarías da cidade e que o Concello financia parte das gardarías da Xunta“, subliñou a delegada territorial do goberno galego, Ana Ortiz.

Nunhas declaracións remitidas aos medios, Ana Ortiz matizou que, na última convocatoria de axudas, a Xunta concedeu 524.000 euros ao Concello para a gratuidade das escolas infantís, “e a cantidade podería ser 5 veces maior, de non ser pola teimosía do alcalde por xudicializar” o financiamento destes servizos.

“Por suposto, imos financiar as máis de 3.400 prazas de Educación Infantil de 0 a 3 anos na cidade“, abundou, antes de lembrar que a Xunta acaba de abrir unha nova escola infantil, a da Cidade da Xustiza, con 41 prazas (con preferencia para fillos de funcionarios).