O alcalde de Vigo, Abel Caballero, avanzou este mércores os temas tratados durante a primeira reunión do comité especial para o Nadal na cidade, que xa traballa co obxectivo de facer das festas “un fenómeno positivo en todos os seus aspectos” para a urbe.

Nun audio difundido aos medios de comunicación, o rexedor indicou que neste primeiro encontro el mesmo estivo presente, a pesar de que o comité estará presidido pola tenente de alcalde, Carmela Silva, e nel estarán os concelleiros responsables das áreas de Seguridade, Mobilidade, Festas, Turismo, Comercio e Medio Ambiente, ademais do segundo tenente de alcalde, Javier Pardo.

Abel Caballero explicou que este grupo tratará de coordinar todas as cuestións relacionadas co Nadal, como o tráfico, os aparcadoiros, a mobilidade, a localización das atraccións ou o propio ruído que xeran as festas na cidade. “O Nadal vai ir máis aló. Xa o sabemos. Temos que estender o Nadal e levalo o máis posible a máis lugares da cidade, para dispersalo no conxunto da cidade para que haxa aproveitamento dos beneficios directos que xera en todas partes e para evitar as grandes concentracións de cidadáns”, reivindicou o alcalde olívico.

Por iso, puxo o foco na procura de máis emprazamentos e en “minimizar os efectos colaterais” do Nadal, a pesar de que recoñeceu que sempre hai “xente antivigo”. Abel Caballero subliñou que a través do diálogo tentarase facer do Nadal un “fenómeno positivo en todos os seus aspectos”, corrixindo cuestións que afectan os cidadáns.