O alcalde de Vigo, Abel Caballero, anunciou este martes a creación dun comité especial para o Nadal na cidade, co obxectivo de “facer crecer” esta celebración, pero “minimizando os seus efectos colaterais”.

Nun audio difundido aos medios de comunicación, o rexedor indicou que este comité estará presidido por Carmela Silva, a primeira tenente de alcalde. Nel tamén estarán os concelleiros responsables das áreas de Seguridade, Festas, Turismo, Comercio e Medio Ambiente, ademais do segundo tenente de alcalde, Javier Pardo.

Será este mércores, día 9 de agosto, cando se reúnan por primeira vez, contando coa presenza do propio Abel Caballero. A idea é conseguir que o Nadal de Vigo “vaia a máis”, pero en “mellores condicións” para a cidade, “eliminando os efectos colaterais” que producen “dificultades” para algúns veciños.

Este comité tomará decisións relativas a aspectos como seguridade, ordenación cidadá, tráfico ou a localización das atraccións do Nadal. Caballero volveu a pór en valor o Nadal de Vigo como unha “celebración de rango mundial” e un “fenómeno turístico” en Europa.