A Fiscalía pide 8 anos de prisión para unha enfermeira, veciña de Vigo, acusada dun delito contra a saúde pública por administrar á súa filla menor de idade medicamentos perigosos para a súa idade, entre eles opioides, e que será xulgada este martes na sección quinta da Audiencia de Pontevedra, con sede na cidade olívica.

Segundo o escrito de acusación pública, entre finais de 2018 e decembro de 2020, a procesada administrou á súa filla (desde que tiña dous anos ata o catro) medicamentos como tramadol, un opioide; flecainida, un antiarrítmico; e prometazina, que se usa como antihistamínico. A acusada tiña a custodia da menor e convivía con ela.

A Fiscalía sostén que a enfermeira realizou estes actos “coñecendo o grave risco” que entrañaba para a saúde da nena tomar esas drogas. En marzo de 2022 ditouse auto xudicial polo que se outorgou a garda e custodia da menor ao seu pai.

A Fiscalía considera á muller autora dun delito contra a saúde pública na súa modalidade de sustancias que causan grave dano á saúde, concorrendo a circunstancia cualificadora (prevista no código penal) de facilitar as sustancias a un menor de 18 anos. Así mesmo, pide que se aplique a agravante de parentesco.

Por todo iso, pide que a acusada sexa condenada a 8 anos de prisión e que se lle prive da patria potestade sobre a nena.