A sección cuarta da Audiencia Provincial de Pontevedra xulgará os días 23 e 24, a partir das 10,00 horas, a seis acusados dun delito de tráfico de drogas na Guarda, para os que Fiscalía pide entre seis e nove anos de cárcere. O caso procede do xulgado de instrución número 2 de Tui.

O Ministerio Público destaca no seu escrito de acusación que responden todos dos feitos constitutivos de delito contra a saúde pública en concepto de autores polo delito de tráfico de drogas. Dous dos acusados viaxaron coa heroína e a sustancia de corte desde La Zubia ata Madrid o 22 de marzo de 2021 co propósito de proceder á súa venda ilícita dirixíronse en senllos vehículos á Guarda, segundo o escrito fiscal.

Unha vez chegaron á Guarda, estacionaron na zona dos Arcos o automóbil no que deixaron a heroína e a sustancia de corte e fóronse a un hotel a durmir. Esa mesma noite, outro dos acusados abriu o maleteiro do vehículo e “con ánimo de obter un inmediato e ilícito beneficio económico levou unha maleta que contiña o seis paquetes de heroína e o paquete coa sustancia de corte, ademais de distintas pezas de roupa”.

Dirixiuse ao domicilio doutro dos acusados, na Guarda, onde tamén se atopaba outra acusada, “e entre o tres repartíronse a heroína”. “Cando a mañá do día 24 de marzo de 2021” un dos acusados foi detido por axentes da Garda Civil en virtude dunha requisitoria do Xulgado do Penal número 1 de Pontevedra, a acusada tratou de cambiar de lugar os paquetes de heroína, “sendo sorprendida cando abandonaba o hotel portando dous paquetes de heroína de máis de 1.000 gramos de peso neto cada un deles”.

A heroína intervida procedente do alixo entregado e trasladado á Guarda foi valorada atendendo ao prezo medio que esta sustancia alcanza no mercado ilícito cun valor total duns 319.000 euros. A intervida noutro domicilio, distinta da procedente do anterior alixo, foi valorada nuns 2.500 euros. Mentres, a cocaína intervida noutro domicilio foi valorada en case 900 euros e a marihuana, pola súa banda, en 1.363,26 euros.