A xunta de goberno da Deputación de Pontevedra aprobou novas achegas do ‘Plan Concellos 2020’ por importe dun millón de euros, que beneficiarán aos municipios de Moraña, Tui, Rodeiro, O Grove e A Illa de Arousa. Estas axudas permitirán abordar investimentos relacionados coa mellora dos viarios urbanos e dotacións municipais, segundo remarca a Deputación nun comunicado.

O goberno provincial tamén autorizou a contratación do novo convenio que garantirá a administración electrónica nos concellos durante o próximos catro anos. Por outra banda, informou de que a juta de goberno tamén aprobou a concesión de subvencións, en concorrencia competitiva, que permitirán a 14 concellos desenvolver actividades de carácter turístico na provincia.

Estas axudas, ás que este ano a institución provincial destina 95.000 euros, teñen como obxectivo colaborar co fomento do turismo e a profesionalización do sector, así como promover a realización de accións con repercusión turística provincial.