A portavoz nacional do Bloque Nacionalista Galego (BNG), Ana Pontón, subliñou a importancia de que o Cume Ibérico sirva de “impulso” á conexión ferroviaria entre Galicia e Portugal. Así o sinalou Pontón este mércores en Vigo, a dous días de que leve a cabo en Viana do Castelo (Portugal) este encontro entre os gobernos de Pedro Sánchez e Antonio Costa.

A nacionalista puxo en valor o “alcance económico” e a “potencialidade de futuro” que teñen as relacións entre Galicia e o país veciño, polo que solicitou á Xunta que instale en Lisboa unha “sede permanente” para impulsar accións “estratéxicas” en ámbitos como o enerxético, o tecnolóxico ou as infraestruturas.

Así, subliñou a necesidade de “facer valer” a Galicia e “situala no mapa”, pondo o foco na construción do saída sur ferroviaria de Vigo para desenvolver unha liña de alta velocidade entre a cidade olívica e O Porto. “É unha prioridade para Galicia en materia de infraestruturas“, subliñou, apuntando cara a un “déficit claro” no desenvolvemento das infraestruturas ferroviarias galegas que explica que non haxa tren entre Ferrol e Lisboa de altas prestacións.