O alcalde de Tui, Carlos Vázquez Padín, remitiulle unha segunda carta ao presidente do Goberno, Pedro Sánchez, na que lle reclama que o Goberno asuma o custo de retirar e tratar os cascallos do barrio da Torre, na parroquia de Paramos, destruído após a explosión dun almacén clandestino de material pirotécnico o pasado 23 de maio.
Na devandita misiva, ademais de reiterar a invitación a visitar a zona, o rexedor tudense reclama que sexa a administración central a que asuma ese gasto de desentullo, despois de que o Concello xa adxudicase os traballos de retirada do amianto por máis de 346.000 euros e contratase o proxecto de xestión de residuos por case 60.000 euros.
Por outra banda, reclama ao Goberno que “complemente” as axudas que o propio Concello e a Xunta outorgarán ás familias afectadas para rehabilitar as súas casas, tanto para primeiras como segundas vivendas, con ou sen seguro.
Finalmente, Vázquez Padín solicita que se exima do pago do IBI aos veciños que perderon esas vivendas, así como da tributación pola percepción desas axudas.
