O xulgado do Contencioso Administrativo número 1 de Vigo ditou sentenza na que anula a posta en funcionamento da área Metropolitana, estimando parcialmente o recurso interposto pola Xunta de Galicia contra as actuacións administrativas relativas á constitución deste ente supramunicipal, por non estar integrada a cidade olívica no plan de transporte metropolitano impulsado polo goberno autonómico.
A área constituíuse nunha asemblea que se celebrou o 1 de decembro de 2016, e na que o entón alcalde de Salvaterra, Arturo Grandal, como membro de maior idade, foi o encargado de revisar as certificacións dos concelleiros metropolitanos para a súa toma de posesión.
Tras esa toma de posesión e tras a constitución da asemblea, Grandal suspendeu a sesión durante uns minutos para consultar sobre certas irregularidades relativas ás credenciais de dous edís (de Moaña e Gondomar) e tamén debido ao debate suscitado polo feito de que o Concello de Vigo non se integrou no plan de transporte metropolitano da Xunta (requisito recollido na lei da área).
Ante a diverxencia de pareceres, optou por suspender definitivamente a reunión, e os representantes do PP abandonaron a asemblea. No entanto, a sesión continuou e os representantes que quedaban elixiron a Abel Caballero como presidente da área Metropolitana; días despois desta accidentada primeira asemblea constituíuse a Xunta de Goberno da área Metropolitana, celebráronse varias reunións e outros actos administratativos.
A Xunta de Galicia presentou un recurso contra a constitución do ente supramunicipal e contra os acordos adoptados, argumentando que o Concello de Vigo non cumprira o requisito de integrarse de forma efectiva no plan de transporte metropolitano.
ESTIMACIÓN PARCIAL
Na sentenza do Contencioso Administrativo de Vigo que se coñeceu este mércores establécese que a asemblea do 1 de decembro de 2016 foi “válidamente constituída” e, tras sinalar que o alcalde de Salvaterra non estaba facultado para suspender a sesión (algo que só podería facer se non houbese ‘quórum’), o xuíz determinou que a elección de Abel Caballero como presidente da área Metropolitana foi “axustada ao ordenamento xurídico”.
No entanto, o maxistrado declara inválidos os actos posteriores para a posta en funcionamento do ente, unha posta en funcionamento que só pode producirse tras a efectiva integración de Vigo no plan de transporte metropolitano (como declara a lei da área Metropolitana).
O xuíz lembra na súa resolución que a lei da área Metropolitana do ano 2012 nunca chegou a porse en práctica e que foi posteriormente modificada, despois de que o Concello de Vigo e a concesionaria do bus urbano, Vitrasa, asinasen en xullo de 2016 un convenio coa Xunta para a integración da cidade no transporte metropolitano.
Ese convenio implicaba que a empresa de transporte debía realizar as adaptacións tecnolóxicas necesarias e aplicar as tarifas pactadas, e na modificación da lei da área estableceuse que o concello olívico debía integrarse nese plan de transporte de forma efectiva, como condición previa á posta en marcha do ente supramunicipal.
UNHA “QUIMERA” SEN O TRANSPORTE
O maxistrado apunta que, sen esta integración no plan de transporte, o funcionamento da área Metropolitana de Vigo “volvería ser, como 4 anos antes da reforma (da lei), unha quimera”.
Así mesmo, constata que, a pesar da firma do convenio de xullo de 2016, nunca chegaron a materializarse nin as adaptacións tecnolóxicas nin a aplicación de tarifas, polo que declara inválidos os actos producidos despois da constitución da asemblea e da elección do presidente da área.
Iso quere dicir que se anulan os pasos posteriores a esa asemblea constituínte (constitución da Xunta de Goberno, reunións deste órgano e outros actos), encamiñados á posta en marcha do ente supramunicipal. A sentenza do xulgado do Contencioso Administrativo de Vigo pode recorrerse en apelación, no prazo de 15 días.
