InicioPolíticaNovo enfrontamento entre Abel Caballero e Xunta pola orixe da idea sobre...

Novo enfrontamento entre Abel Caballero e Xunta pola orixe da idea sobre a iluminación de Rande

O rexedor, en presenza da conselleira de Infraestruturas, Ethel Vázquez, fixo fincapé na importancia da ampliación, unha obra que subliñou, foi decidida polo goberno bipartito da Xunta, o goberno de Zapatero, e el mesmo, como alcalde.

PUBLICADO O

A Xunta e o Concello de Vigo volveron a pór de manifesto, este venres as súas diferenzas, e esta vez non foi polos investimentos na cidade, polo transporte metropolitano, ou pola candidatura de Cíes a Patrimonio da Humanidade, senón por unha cuestión máis prosaica: a iluminación da ponte de Rande.

Despois de que o presidente galego, Alberto Núñez Feijóo, xa puxese de manifesto que el mesmo trasladou esa idea a Audasa hai un ano, o alcalde de Vigo, Abel Caballero, aproveitou a súa intervención durante a inauguración dunha exposición sobre a famosa ponte, “que non está propiamente en Vigo, pero é a ponte de Rande de Vigo”, para deixar ben claro que esa iluminación é unha iniciativa do Goberno de España, en concreto, do Goberno de Pedro Sánchez.

O rexedor, en presenza da conselleira de Infraestruturas, Ethel Vázquez (que tamén acudiu á inauguración da mostra), fixo fincapé na importancia da construción da ponte para vertebrar o territorio, e tamén na importancia da ampliación, unha obra que subliñou, foi decidida polo goberno bipartito da Xunta, o goberno de Zapatero (con José Blanco como Ministro de Fomento), e el mesmo, como alcalde.

Abel Caballero, en declaracións aos medios tras o acto, reiterou que a iluminación da ponte de Rande é “competencia, decisión, e con autorización” do Goberno de España, e “só do Goberno de España”. Segundo o alcalde, en Moncloa están “atónitos” polo “xesto de deslealdade” de Feijóo, de arrogarse unha actuación e anunciala “a Xunta non teñen ningunha competencia sobre a autoestrada”.

“COMPETENCIA” ÁS LUCES DE NADAL

Segundo o rexedor olívico, a intención do presidente galego ao anunciar esa actuación (fixérono a delegada da Xunta e a conselleira Ethel Vázquez en Vigo) era “facer sombra e facerlle a competencia ás luces de nadal” que ese mesmo día empezaron a colocarse na urbe olívica.

Abel Caballero subliñou que el mesmo ten coñecemento desde hai tempo do proxecto da iluminación, e podería falar “moitísimo máis do que saben a conselleira e o señor Feijóo”, pero que non o fixo, á espera de que sexa o Goberno central o que detalle a actuación.

“Corríalles moita présa anuncialo, e facelo o mesmo día que anunciamos a iluminación do Nadal”, incidiu, e vaticinou que, dentro duns anos, acenderanse as luces de Nadal e as de Rande ao mesmo tempo, nun evento “que vai chegar a Nova York, Tokio,…a todas partes”.

“PETICIÓN EXPRESA” DE FEIJÓO

Pola súa banda, a conselleira Ethel Vázquez incidiu, en declaracións aos medios, que foi o presidente da Xunta o que, en novembro de 2017, trasladou ao responsable de Audasa, César Canle, a idea de iluminar a ponte como emblema e icona da ría de Vigo e da cidade olívica.

Segundo apuntou, a empresa está a traballar na iniciativa “por petición expresa do presidente Feijóo”, e pediu os informes preceptivos da AESA (Axencia Estatal de Seguridade Aérea). Así mesmo, confirmou que, aínda que a iluminación será sufragada por Audasa, o presidente galego ofreceu colaboración técnica e económica do goberno autonómico.

“O presidente pensou que, do mesmo xeito que está iluminada a Torre de Hércules, deberiamos traballar conxuntamente na iluminación de Rande, que “merece ter luz propia” para ter o protagonismo que merece de día, “e tamén de noite”.

EXPOSICIÓN

Alcalde e conselleira fixo estas manifestacións no marco da inauguración dunha mostra na viguesa rúa do Príncipe na que, a través de diversos paneis con fotografías e textos, faise un percorrido pola historia desta emblemática infraestrutura.

O decano do Colexio de Enxeñeiros de Camiños, Canles e Portos de Galicia, Enrique Urcola, subliñou que a construción da ponte de Rande foi un “fito da enxeñaría civil” no mundo, do mesmo xeito que o foi a súa ampliación, unha obra “inédita e pioneira” a nivel internacional.

Urcola destacou, así mesmo, a “integración paisaxística” da ponte de Rande na ría de Vigo, e o recoñecemento que tivo por parte de profesionais e organizacións de todo o mundo. “É a imaxe de marca da ría de Vigo”, sentenciou.

ÚLTIMAS

Vigo supera de novo os 300.000 habitantes, “de longo a maior cidade de Galicia”

O alcalde de Vigo, Abel Caballero, anunciou que a cidade volveu a superar os 300.000 habitantes...

Case nove de cada dez usuarios da Asociación Érguete en Vigo comezou a consumir drogas antes dos 18 anos

Preto do 88% dos usuarios da Asociación Érguete en Vigo comezou a consumir drogas antes...

Abel Caballero celebra a chegada da moi alta tensión eléctrica á cidade: “É o que Stellantis e a cidade quería”

O alcalde de Vigo, Abel Caballero, celebrou este mércores o anuncio da aprobación no Consello...

Interceptan un conductor que superaba por cinco puntos a taxa de alcol permitida

A Policía Local de Redondela interceptou o pasado domingo a un home, veciño de...