Abel Caballero resta importancia ao apercibimento da Xunta Electoral por vulnerar a lei

O órgano xudicial constatou que vulnerou a lei electoral, e o alcalde asegura que as denuncias "se arquivaron"

A xunta electoral apercibe a Abel Caballero e a Carmela Silva por unhas declaracións que "vulneran a neutralidade". DEPUTACIÓN DE PONTEVEDRA

O alcalde de Vigo e candidato á reelección, Abel Caballero, restou importancia este xoves ao apercibimento que lle fixo a xunta electoral por “vulnerar a neutralidade”, xa que “non houbo procedemento sancionador”, e mesmo asegurou que este órgano “arquivou” as tres denuncias presentadas polo PP.

Caballero lembrou que o grupo municipal ‘popular’ presentou tres denuncias ante a Xunta Electoral por vulneración da lei electoral por parte do rexedor e da presidenta da Deputación, Carmela Silva, en tres actos: unha feira de ensinos artísticos e profesionais, o acto dos Vigueses Distinguidos e un acto con beneficiarios de bolsas municipais de inglés.

A este respecto, Caballero confirmou que a xunta electoral “nin sancionou ao alcalde nin á presidenta da Deputación”, a pesar de que o PP “pedía multas de entre 300 e 3.000 euros”. Segundo o rexedor, a xuíza “dille ao PP que non”, e “o expediente quedou en actuacións previas. “As tres (denuncias) foron arquivadas na fase de actuacións previas”, recalcou.

O alcalde insistiu en que as denuncias non foron estimadas, senón “arquivadas” e acusou ao PP de “mentir” e “calumniar”, porque non quere que se fale dos logros do goberno local e do avance da cidade.

CONTIDO DA RESOLUCIÓN

Con respecto ao contido da resolución da autoridade electoral, o alcalde apuntou que “dá igual o que diga”, porque “o importante é que non abre procedemento sancionador”. “Fíxose dilixencia previa e arquivouse”, reiterou.

A xunta electoral de zona apercibiu ao alcalde de Vigo, Abel Caballero, e á presidenta da Deputación de Pontevedra, Carmela Silva, por unhas manifestacións realizadas durante un acto o pasado 25 de marzo nas que se enxalzaba o labor realizado por ambos nas institucións e que a autoridade que vela pola limpeza dos comicios considera que “vulneran a neutralidade”.

Na resolución, con data do 5 de abril de 2019, a xunta electoral determinou que ambos os políticos “infrinxiron” o artigo 50 da Lei orgánica de réxime electoral xeneral, é dicir, “utilizaron a súa posición institucional como alcalde e como presidenta da Deputación, valéndose de medios públicos existentes á súa disposición, para efectuar alusións a logros obtidos durante a súa xestión”.

“Son declaracións que enxalzan ou difunden o que se presenta como éxitos ou logros de xestión do equipo municipal. Con iso vulnérase o principio de neutralidade política“, sinala a resolución electoral, na que tamén se determina que a difusión a través de Twitter destas mensaxes, desde a conta oficial da Deputación de Pontevedra (retransmitiuse en directo) “supón unha vulneración do principio de neutralidade dos poderes públicos”.

Por iso, a xunta electoral acordou requirir ao alcalde de Vigo e á presidenta da Deputación que “se absteñan de realizar actuacións similares” e apercibiunos de que, no caso de que se volvan a repetir “quebrantamentos no futuro”, “incoarase un expediente sancionador”.

Ademais, pídese á presidenta da Deputación que “retire da súa rede social” Twitter, da conta oficial da institución provincial, “as declaracións pronunciadas” na inauguración da mencionada feira, as cales están recollidas na resolución da autoridade xudicial.

DENUNCIAS DO PSOE

Por outra banda, Abel Caballero recoñeceu que o PSOE tamén interpuxo dúas denuncias contra o PP, por declaracións en senllos actos de Diego Gago e Elena Muñoz. Segundo o rexedor, ditas denuncias “arquiváronse” e “tiveron o mesmo tratamento, exactamente igual” que as que interpuxeron os ‘populares’.

Con todo, o certo é que, mentres que a xunta electoral si apercibiu a Caballero e Silva –aínda que non os sancionou–, as denuncias do seu partido contra o PP foron “desestimadas”, segundo as resolucións, ás que tivo acceso Europa Press.

Abel Caballero e Carmela Silva son apercibidos por unhas declaracións que “vulneran a neutralidade”