A presidenta do PP de Vigo, Luisa Sánchez, destacou o seu compromiso para que a cultura da cidade olívica “volva latexar con forza” e puxo como exemplo a recuperación do Teatro Cine Fraga para que “volva ocupar o lugar que merece”. “Queremos que a cultura de Vigo volva latexar con forza, estamos ao carón das asociacións, das entidades e tamén dos artistas”, remarcou este sábado acompañada polo portavoz e vicesecretario de Cultura e Deporte do PP, Borja Sémper.
Alí, Luisa Sánchez incidiu en que as administracións do Partido Popular “non se conforman” cun posto 26 en calidade e innovación da oferta cultural das cidades. “Aspiramos a que Vigo estea no máis alto dese ranking”, asegurou. Os populares contrapuxeron a súa postura co “abandono e a falta de interese” do goberno de Abel Caballera pola cultura, que “se demostra no feito de que Vigo está á cola de Galicia no gasto en cultura por habitante, segundo o último informe do Consello da Cultura Galega, só superado por Ourense”.
“É un alcalde que escatima recursos e afoga con atrancos administrativos aquelas propostas nas que non pode exercer de teloneiro. Pero esa forma de actuar, ese asedio e ese bloqueo ás entidades viguesas, teñen os días contados”, advertiu. Pola súa banda, Borja Sémper enxalzou a “aposta” da Deputación de Pontevedra e da Xunta por “recuperar o Teatro Cine Fraga”, que representa a “vocación da iniciativa privada e a determinación de dúas administracións que van recuperar un dos edificios máis importantes da España do século XX”.
