O PP de Vigo esixiulle este martes ao goberno local a retirada da firma de José Luis Ábalos do Libro de Honra do Concello de Vigo, tras a condena a 24 anos de prisión imposta ao exministro e exsecretario de Organización do PSOE. A presidenta local do partido, Luisa Sánchez, advertiu de que “manter o nome dun condenado por organización criminal, suborno e malversación no libro de distincións da cidade é unha mancha inaceptable”. Sánchez lembrou que se trata de “a condena máis alta que se impuxo nunca no noso país a un exministro”, o que, ao seu xuízo, amosa “a gravidade do asunto”, á espera ademais de como rematen outros procesos xudiciais en curso.

UNHA SINATURA DE 2018

O PP reclama que se retire a sinatura que Ábalos deixou no Libro de Honra durante unha visita a Vigo en outubro de 2018, cando exercía como ministro de Transportes. Luisa Sánchez anunciou que interpelará o goberno local sobre este asunto no próximo pleno municipal, previsto para o 29 de xuño. A dirixente popular lembrou que aquela visita “se desenvolveu entre risas e apertas de Caballero co agora condenado” e engadiu que Ábalos “non deixou en Vigo máis que falsas expectativas verbo do AVE por Cerdedo”.

O PRECEDENTE DA DEPUTACIÓN DE PONTEVEDRA

Por outra banda, Sánchez lembrou que a Deputación de Pontevedra xa tomou unha decisión semellante hai dez días, cando retirou a firma de Leire Díez do seu Libro de Honra. A presidenta local do PP apuntou tamén contra a expresidenta da institución provincial e actual tenente de alcalde en Vigo, Carmela Silva, da que dixo que “se desfixo en declaracións de profundo afecto”, deixando, ao seu xuízo, “unha imaxe bochornosa” ante a coñecida como “fontaneira” do PSOE.

“OU SE ESTÁ DO LADO DA XUSTIZA OU DOS CORRUPTOS”

A portavoz municipal do PP reclamou unha posición clara por parte do executivo local de Abel Caballero. “Non caben medias tintas neste asunto. Ou se está do lado da xustiza e do bo nome de Vigo, ou se está do lado dos corruptos e da corrupción”, proclamou Sánchez. A dirixente popular lembrou ademais que o goberno de Abel Caballero se negou a retirar a Medalla de Ouro da cidade concedida a Isabel Pardo de Vera, imputada por supostas adxudicacións irregulares. Para o PP vigués, a permanencia da firma de Ábalos no Libro de Honra suporía manter unha distinción simbólica incompatible coa gravidade da condena imposta ao exministro.