O BNG rexistrou unha Proposición non de Lei no Congreso para instar o Goberno central á instalación de pantallas acústicas no percorrido da AP-9 polo barrio vigués de Teis, para acabar coa “tortura de ruído” que padecen os veciños, e para reclamar a conversión en tramo urbano desa parte da autoestrada. Os nacionalistas fan esta petición despois de que este barrio quedase excluído do Plan Estatal de Acción contra o Ruído ata 2029 por parte do Ministerio de Transportes e Mobilidade Sustentable.
O deputado Néstor Rego tachou de “inxusta e inxustificable” esta exclusión, que prolongará o “impacto moi grave” dos últimos 40 anos en Teis, unha parroquia dividida pola AP-9 e con niveis de ruído “incompatibles coa saúde e a convivencia”. Así, lembrou que nun informe da concesionaria Audasa reflíctese que este tramo de autoestrada, que soporta un tráfico de entre 50.000 e 60.000 vehículos ao día, é o que ten niveis máis elevados de contaminación acústica. A situación afecta a 13.000 veciños e aos estudantes dos centros educativos da contorna, incidiu o BNG, que apuntou ao alcalde de Vigo, Abel Caballero, como “cómplice e consentidor” ante o incumprimento das promesas do Goberno central.
O portavoz municipal do BNG, Xabier Pérez Igrexas, denunciou os “malos tratos” aos veciños de Teis e preguntouse por que o alcalde non usa a súa “liña directa coa Moncloa”, da que “tantas veces presume”, para que o Ministerio actúe. O BNG volveu reclamar que o tramo de autoestrada desde as Torres de Padín ata o centro de Vigo se convirta en vía urbana e, como paso previo, que se instalen pantallas acústicas e se melloren os pasos elevados de Xarxa e Trapa.
