O BNG de Vigo urxiu ao Concello actuacións no Monte do Castro ante o seu “estado de abandono” e preguntou sobre a recuperación da cafetaría anunciada hai un ano polo goberno local. Nun comunicado, a concelleira nacionalista, Ana Martínez, lamentou a “falta de mantemento” do devandito monte, criticando que non se rexistraron “avances” da reapertura da cafetaría situada na praza e miradoiro Martín Códax, pechada en 2009.

“Non se entende que o Concello desatenda desta forma este emblema da cidade, que usan a diario centos de vigueses para pasear, facer deporte ou como punto de encontro”, lamentou Martínez. Ela ve “inexplicable” que a contorna do miradoiro estea “absolutamente inutilizada” desde o peche da cafetaría hai 16 anos, polo que solicitou ao Concello sobre as súas previsións para a zona, tras anunciar en abril de 2024 a súa intención de recuperalo. “É inaceptable que o tempo pase e o Concello continúe sen prestar atención a este miradoiro absolutamente deteriorado, que supón ademais un perigo para a cidadanía”, engadiu a edil do Bloque.