O Conselleiro de Educación, Román Rodríguez, comprometeu este martes os “recursos necesarios” para implementar a “resposta adecuada ás necesidades” dos alumnos de secundaria que están ingresados na unidade infanto-xuvenil de Saúde Mental do Hospital Álvaro Cunqueiro de Vigo, para os que as súas familias piden un docente presencial e non sesións virtuais.

Así o dixo o conselleiro en resposta a unha pregunta formulada pola deputada socialista Cristina Fernández Davila en referencia á situación dos alumnos de secundaria ingresados nesta unidade de agudos que, apuntan as familias, non terían un “seguimento correcto” coa docencia virtual, indicada en principio para o seu nivel educativo en casos de menores ingresados.

“Moitos deles non son autónomos e algúns teñen recomendado o uso limitado de dispositivos electrónicos”, dixo Cristina Fernández durante a súa intervención.

A deputada socialista facíase eco das reclamacións das familias afectadas, que inicialmente recibiron a indicación de que os seus fillos recibirían docencia virtual sen docentes presenciais, unha modalidade, dixeron, “desaconsellada polo persoal médico para este tipo de alumnado”. Máis recentemente, a consellería xa avanzou que a esta docencia sumaríase un “coordinador” presencial, para o que Román Rodríguez non deu data.