O presidente da Deputación de Pontevedra, Luís López, e o alcalde de Vigo, Abel Caballero, asinaron este venres tres convenios para “salvar” investimentos como a humanización da rúa San Roque ou as ramplas mecánicas de Pintor Colmeiro.

En concreto, a cantidade total alcanza os 6,2 millóns de euros, dos que case o 70% provirán de fondos provinciais. Ademais destas dúas obras; cifradas en 2,82 millóns e 2,27 millóns, respectivamente; construirase un ascensor en Juan Ramón Jiménez por uns 1,14 millóns.

Estes convenios, tal como xa anunciaron as administracións en xullo, son unha “solución” para rescatar as partidas que estaban próximas a caducar correspondentes a proxectos que o Concello non chegou a executar. Por iso, é necesario actualizalos para poder investir estas cantidades.

“Había tres alternativas: lamentarnos, buscar un culpable ou solucionalo. Esta última foi a que eliximos”, reivindicou López, agradecendo o traballo da vicepresidenta da Deputación, Luisa Sánchez, porque “sen a súa insistencia non se chegaría aquí”. López puxo en valor as melloras que levarán a cabo na cidade con estes investimentos e destacou a colaboración co Concello á hora de sacalos adiante.

Pola súa banda, Abel Caballero tamén quixo agradecer á Deputación todo o que está a facer por Vigo nos últimos meses, destacando que, pese ao cambio de cor política no goberno provincial, segue “cumprindo os compromisos que tiña Carmela Silva”.

“O que veña a Vigo a facer cousas, alfombra vermella. Non hai cores políticas”, subliñou na súa intervención no acto de firma do tres convenios. Caballero falou tamén do convenio polo cal a Deputación destina 5 millóns anualmente á cidade para acometer distintas obras.