A concelleira de Urbanismo do goberno municipal de Vigo, a socialista María José Caride, trasladou este martes a súa “sorpresa” por unhas declaracións da alcaldesa de Mos, Nidia Arévalo (PP) criticando o mal estado da autovía A-55 ao seu paso por este municipio, e afeou á rexedora que fale do estado dese viario e, con todo, non defendese a construción dunha nova autovía en túnel entre Vigo e O Porriño que, ademais de mellorar a comunicación da cidade olívica, despexaría de tráfico a rede viaria mosense.

Nunhas declaracións gravadas e remitidas aos medios, Caride censurou que, “cando Feijóo (sendo presidente da Xunta) negou a necesidade dunha nova autovía”, Nidia Arévalo “estivo calada”. “Todos sabemos que para comunicar adecuadamente Vigo e para liberar unha parte do tráfico rodado en Mos, a mellor alternativa é unha autovía en túnel” entre Vigo e O Porriño, explicou.

Caride criticou que, fronte a esa alternativa “de futuro”, a rexedora de Mos “defendeu que non era necesaria, que era preferible condenar aos vigueses a dar un percorrido polas Gándaras para acceder á A-52 nun cruzamento que xa é inseguro”. A concelleira viguesa tamén se referiu á intención de Nidia Arévalo de comunicar a cidade deportiva do Celta cun “punto negro da A-55 en Mos”, no que a velocidade está limitada a 60 quilómetros por hora. “Ese proxecto parecíalle xenial, pero agora di que non é correcto o estado das autovías”, criticou.

Caride asegurou que o goberno de Vigo defende “todas as obras necesarias” para que as autovías teñan un correcto estado de conservación e mantemento, “faltaría máis”, pero insistiu en que “a alternativa de futuro” para mellorar as conexións de Vigo e o tráfico rodado en Mos é unha nova autovía en túnel.