A Xunta de Galicia propuxo ao que foi alcalde de Vigo e conselleiro de Traballo con Manuel Fraga Manuel Pérez Alvarez como novo presidente do Consello Económico e Social de Galicia (CES) tras a marcha de Agustín Herández.

Diso informou o Goberno galego nun comunicado, no que explica que, despois de trasladar esta proposta ás organizacións sindicais empresariais e ao resto de asociacións e entidades representadas no pleno do CES, o conselleiro de Facenda e Administacións Públicas, Miguel Corgos; e a conselleira de Economía, María Jesús Lorenzana, elevarán esta proposta conxunta para ocupar a presidencia deste organismo consultivo da Xunta en materia socioeconómica.

O nomeamento corresponderá ao presidente da Xunta, Alfonso Rueda, unha vez que se produza a comparecencia do candidato proposto ante o Parlamento galego, como establece a lexislación autonómica.

Licenciado en Dereito pola Universidade de Santiago e pertencente á súa etapa laboral ao corpo de inspectores de Traballo, Manuel Pérez Álvarez (decembro de 1946) foi conselleiro de Traballo e Asuntos Sociais do Goberno galego (1989-1995), alcalde de Vigo (1995-1999) e membro do Parlamento Europeo (1999-2004).

A Xunta lembrou que durante a súa etapa como conselleiro no Goberno de Manuel Fraga destaca a súa participación na posta en marcha da Renda de Inclusión Social (RISGA). Á fronte do Consello Económico e Social de Galicia, corresponderalle presidir este foro permanente de diálogo e deliberación entre a sociedade civil e a administración autonómica.