O BNG propuxo este venres a creación dun parque municipal de vivenda social en Vigo, con polo menos 300 pisos, antes de que termine o ano, e denunciou que a Xunta do PP “dinamitou” a política de vivenda pública en Galicia.

Segundo apuntou a portavoz nacional do Bloque, Ana Pontón, nun acto electoral no que participou no barrio vigués do Calvario, “é impresentable que o PP dinamitase a política de vivenda pública” en Galicia, onde prometeu impulsar 870 vivendas no Plan de Vivenda 2015-2020 e “só impulsou 14”, prometeu rehabilitar 3.000 vivendas co Plan Rexurde, “e só rehabilitou 10, e “entre 2016 e 2018 só puxo a disposición dos galegos unha vivenda de protección pública en réxime de aluguer”.

Ana Pontón defendeu que o BNG “ten propostas” para “axudar á xente” no acceso á vivenda, que é “un dereito fundamental” e sinalou que os nacionalistas propoñen aumentar as axudas para o aluguer, un “parche necesario” mentres non se implementan políticas que fagan baixar os prezos desas rendas; potenciar as vivendas públicas en aluguer; destinar, no caso do barrio de Navia (onde a Xunta promove a construción de 1.600 vivendas), un 75 % do novo parque residencial a vivenda pública “priorizando o aluguer”.

O BNG expuxo que tamén é necesario “mobilizar” a vivenda baleira, con medidas fiscais que obriguen aos grandes tenedores a sacar ao mercado esas vivendas, e promovendo, por parte da Xunta, “un banco galego de vivendas” para polas a disposición dos cidadáns.

CANDIDATO Á ALCALDÍA

Pola súa banda, o candidato do BNG á alcaldía de Vigo, Xabier Pérez Igrexas, subliñou que o acceso á vivenda supón un “gravísimo problema” na cidade, onde hai 18.500 pisos baleiros e máis de 4.000 demandantes de vivenda pública protexida.

A iso súmase a subida do prezo dos alugueres, apontoada polo aumento da vivenda turística. Por todo iso, propuxo, como “plan de choque”, habilitar un parque municipal de vivenda en Vigo, con polo menos 300 pisos, antes de que acabe este ano.

Pérez Igrexas tamén apostou por apoiar o cooperativismo e destinar máis recursos á rehabilitación de vivendas, todo iso para evitar que as clases traballadores e os mozos síganse marchando da cidade por non poder acceder a unha vivenda a prezo digno.