O alcalde de Vigo, Abel Caballero, criticou este luns que a Xunta de Galicia teña o Porto da cidade “descabezado” tras o cesamento de Jesús Vázquez Almuíña, que deixou o organismo para centrarse na súa candidatura á Alcaldía de Baiona, e insistiu en que, se Vázquez Almuíña seguise á fronte da Autoridade Portuaria, sería “inelexible” como alcalde, a pesar de existir un informe da Avogacía do Estado que di o contrario.
Nunha rolda de prensa, o rexedor olívico referiuse ao cesamento de Vázquez Almuíña, publicado este luns no BOE (aínda que deixou o cargo de forma efectiva o pasado 20 de abril) e constatou: “Era inelexible, como dixemos nós, pero querían facelo ‘coar’, a ver se non tiña que dimitir para presentarse”.
Así, Caballero fíxose eco dunha denuncia pública realizada polo PSOE de Vigo o pasado 24 de febreiro, na que os dirixentes socialistas locais aludían a un ditame da Xunta Electoral polo que se declaraba inelexible a un candidato á Asemblea de Melilla do PP, por ser presidente da Autoridade Portuaria desa circunscrición electoral. O PSOE vigués declarou entón que, segundo ese ditame, Vázquez Almuíña tería que dimitir porque sería “inelexible” e criticaba a súa intención de compaxinar a presidencia do Porto coa candidatura á Alcaldía (algo que fixo Abel Caballero en 2007).
O alcalde manifestou a súa “sorpresa” porque, a estas alturas, a Xunta de Galicia aínda non nomease á persoa que vai substituír a Vázquez Almuíña (o PSOE denunciou que Alfonso Rueda lle está “gardando o sitio” á candidata do PP á Alcaldía, Marta Fernández-Tapias, á que augura un “fracaso estrepitoso” o próximo 28 de maio). “Que pasa? é que o Porto de Vigo é de segunda división e pode esperar a ver que pasa nas eleccións?”, cuestionou Caballero, que constatou que o goberno galego ou ben “non ten nomes” para nomear un novo presidente ou presidenta, ou ben “están a esperar por alguén”.
E o mesmo apuntou en relación coa delegación da Xunta na cidade, que ostenta Marta Fernández-Tapias. Segundo Abel Caballero, o porto de Vigo “non debe ser un intercambio de ámbitos electorais” porque é “importantísimo” como institución. Respecto diso, o alcalde sinalou que a Autoridade Portuaria ten un “presidente interino” no Consello de Administración, “sen capacidade real de actuación”.
O SEU CASO
Preguntado acerca da normativa electoral na que se basearía esa inelegibilidad de Vázquez Almuíña, e se estaba en vigor cando el era presidente do Porto, Abel Caballero recoñeceu non ter “nin idea” de se houbo cambios normativos nos últimos anos, e referiuse ao ditame da Xunta Electoral de “fai cinco anos”, referido ao candidato á Asemblea de Melilla.
CRÍTICAS DE RUEDA
Pola súa banda, o presidente da Xunta, Alfonso Rueda, cualificou este luns como “curioso” o posicionamento do alcalde de Vigo, Abel Caballero, e lembrou que o propio rexedor foi presidente do organismo portuario “ata despois das eleccións” municipais de 2007, tras as que foi designado rexedor.
En resposta a preguntas dos medios antes de participar nun xantar coloquio organizado polo Círculo de Empresarios de Galicia en Vigo, Alfonso Rueda constatou que o rexedor parece que ten na dirección do Porto “a súa primeira preocupación”, algo que “é curioso”, tendo en conta que o propio Abel Caballero foi presidente da Autoridade Portuaria olívica ata despois dos comicios municipais de 2007.
