A Orquestra Clásica de Vigo recuperou uns timbais de máis de 100 anos, que pertenceron á desaparecida banda de música municipal da cidade, e que foron localizados casualmente no faiado da Escola de Música Municipal, onde estiveron nos últimos 30 anos.

Os instrumentos estaban gardados nunhas grandes cestas, obra dun artesán cesteiro da cidade, e foron levados a Nava (Asturias) para que un chapista restaurase o fondo metálico. Así mesmo, renováronse os parches e pintáronse os pés.

Segundo explicou o director da Orquestra Clásica, Manuel Martínez, os timbais foron identificados nunha foto que se conserva no Arquivo Pacheco e que data de 1.912, na que pode verse a parte da banda municipal, cos timbais, e na que tamén quedou retratado o que era director da formación, Mónico García.

Este martes, durante a inauguración da rehabilitación da muralla do Castro, os timbais volveron soar, da man do percusionista Andrés Bernárdez, e acabaron por converterse nos verdadeiros protagonistas do acto.

Por outra banda, os responsables da recuperación dos instrumentos explicaron que, cando ensinaron as cestas ao único mestre cestero que queda en Vigo, recoñeceunos como obra do seu pai, que os elaborou nos anos 50.