A eurodeputada Lidia Senra denunciou ante a Comisión Europea (CE) o proxecto do Porto de Vigo para transformar varias instalacións portuarias obsoletas nunha nova terminal “mediante recheos de gran calado” na Enseada de San Simón, incluída no espazo marítimo da Rede Natura.

Senra rexistrou esta semana unha pregunta parlamentaria por escrito dirixida á Comisión, na que explica ao organismo que estas instalacións “se levarían a cabo nunha área especialmente sensible”, por tratarse “dunha zona de estuario”, así como “unha zona marítima de explotación tradicional que acolle máis de 1.500 postos de traballo en pesca artesanal, marisqueo e bateas de mexillón”.

En relación a esta cuestión, a eurodeputada indica que o Porto de Vigo presenta “índices de utilización dos seus peiraos actuais inferiores ao 50%”, polo que “o tráfico que se pretende desviar á Enseada de San Simón” podería albergarse “nas instalacións que xa hai no propio porto, sen necesidade destas novas”.

Ante esta situación, Lidia Senra pediu á Comisión que se posicione sobre se cre que esta ampliación ten “fundamento” e se é “posible” facelo nun espazo da Rede Natura. O Porto de Vigo, lembra Senra, “non dispón da ferramenta fundamental de planificación da actividade, a Delimitación dos Espazos e Usos Portuarios, porque foi anulado por sentenza do 4 de decembro de 2017 da Audiencia Nacional”.