O goberno municipal de Vigo presentará no pleno deste mércores unha moción na que reclama á Xunta que, a través da figura da encomenda ‘de xestión’, ceda ao Concello a capacidade para manter e limpar as canles do río Lagares, dado que Augas de Galicia o mantén nun estado de “abandono e deterioración”.
Así o trasladou en rolda de prensa a concelleira de Urbanismo, María José Caride, quen lamentou que a canle do río, que discorre na súa totalidade polo termo municipal de Vigo, presenta zonas con material vexetal que non se retira, zonas de servidume que non están expeditas e “nin se vixía nin se conserva” por parte da administración autonómica.
Por iso, o grupo municipal do PSOE instará á Xunta a que faga efectiva unha disposición legal da lei de administración das Comunidades Autónomas, a encomenda de xestión, para permitir que o Concello se encargue da xestión e limpeza do río, sen prexuízo de que a competencia siga sendo autonómica.
Así mesmo, na rolda de prensa deste martes tamén compareceu o portavoz do grupo, Carlos López Font, quen avanzou outras dúas mocións socialistas para o pleno deste mércores: unha para reclamar á Xunta que solvente o problema de seguridade e xestión das obras que fai en Navia, e outra para denunciar a “ocorrencia” “inmoral” da Consellería de Sanidade, sobre o gasto duns 600.000 euros en rotular os hospitais de Galicia.
