A CIG chama a lanzar un “berro de non á guerra” este 1 de maio, Día Internacional do Traballador, pero avisa de que “ten que ser coherente”, en alusión velada ao presidente do Goberno central, Pedro Sánchez. Ademais, a central nacionalista, entre outras loitas en ámbitos como a sanidade, a educación e o metal, insta a a clase traballadora a mobilizarse este Primeiro de Maio contra o “discurso tóxico” do absentismo, unha mensaxe “falsa” que atribúe á patronal e pola que censura o Executivo autonómico, presidido por Alfonso Rueda, que está “fando apoloxía” del.
“Non pode ser que a clase traballadora paguemos a guerra”, advertiu o secretario xeral da CIG, Paulo Carril, en rolda de prensa. Xunto a el, a secretaria confederal de organización, Susana Méndez, explicou que a mobilización de Vigo será a central este ano, no que a central nacionalista lanzará un “berro mundial pola paz e pola soberanía” nunha vintena de vilas e cidades. Carril, pola súa banda, denunciou o aumento do gasto militar e o feito de “estar na OTAN”, así como a promoción de desfiles como o que se celebrará en Vigo, para avisar de que o “berro de non á guerra ten que ser coherente”.
“UNIDADE DE ACCIÓN”
Ademais, animou os traballadores a dar unha “resposta” á “criminalización de persoas enfermas”, polo plan de control de baixas laborais anunciado pola Xunta, que dá máis peso, lamentou, aos “axentes de abuso” que ve nas mutuas. Por último, fixo un chamamento á “unidade de acción”, tamén en alusión velada, neste caso a UGT e CC.OO., fronte ás políticas do Goberno e aos “abusos” da patronal.
