O alcalde de Vigo, Abel Caballero, e o reitor da Universidade de Vigo (UVigo), Manuel Reigosa, asinaron este xoves un convenio para traballar conxuntamente na candidatura das Illas Cíes a Xeoparque Mundial da Organización das Nacións Unidas para a Educación, a Ciencia e a Cultura (Unesco). Tal como explicou o rexedor, trátase dunha “alianza” para que o centro académico realice os estudos técnicos necesarios que acrediten os valores singulares de Cíes como xeoparque para conseguir que sexan distinguidas.

Tras a firma do convenio, que ten un importe de 50.000 euros, Reigosa puxo en valor o “compromiso claro” da UVigo coa candidatura de Cíes. “Temos grandes especialistas na materia. Vaise facer un estudo e documentar a defensa da candidatura e creo que imos ter éxito”, subliñou, segundo recolle o goberno local. Así, Concello e universidade traballarán de forma coordinada en diversas áreas da candidatura, impulsando alianzas co sector turístico e coa comunidade para transformar o patrimonio natural en oportunidades sociais, experiencias turísticas de calidade e aprendizaxe continua para residentes e visitantes.