A Asociación de Veciños e Empresarios do barrio vigués de Cabral (Aveeca) pediron este xoves ao Concello de Vigo medidas para que as obras que se están levando a cabo na área de protección do nacemento do río Lagares non afecten a contorna.

Nun comunicado, a entidade alertou sobre a execución destes traballos polo seu “previsible impacto ambiental”. Tras denuncialo ante o Concello, a asociación lamentou que se estean cortando varias árbores, o que está a xerar unha “importante preocupación veciñal”.

Aveeca teme que as obras non conten coa preceptiva licenza ou que os operarios estean a se exceder dos termos dun hipotético permiso.

“Dado o notable valor natural desta paisaxe e o risco de que estas actuacións o poidan danar ou modificar de forma moi sensible, solicítase ao Concello que adopte, de ser o caso, as medidas necesarias para paralizar os traballos e devolver a contorna ao seu estado orixinal“, demandou.