InicioEconomíaAsime urxe a regularización do polígono industrial da Pasaxe de Gondomar para...

Asime urxe a regularización do polígono industrial da Pasaxe de Gondomar para non lastrar o “crecemento industrial”

Foi xa aprobado polo Concello de Gondomar e está pendente da validación definitiva por parte do Concello de Vigo e da Xunta de Galicia.

PUBLICADO O

- Advertisement -

A Asociación de Industrias do Metal e Tecnoloxías Asociadas de Galicia (Asime) e a Asociación Empresarial A Pasaxe urxiron a regularización do polígono industrial situado na parroquia de Vincios (Gondomar) para non lastrar o “crecemento industrial” do sector na comarca.

Precisamente na mañá deste venres ambas as asociacións analizaron a situación do proceso de regularización do polígono, que foi xa aprobado polo Concello de Gondomar e atópase pendente da validación definitiva por parte do Concello de Vigo e da Xunta de Galicia.

“Con esta regularización, esperada durante décadas polas 70 empresas situadas no polígono da Pasaxe, preténdese dar solución a unha falta de regularidade urbanística que está a lastrar o crecemento industrial do sector da comarca”, reivindicaron as dúas asociacións.

Neste sentido, o presidente da Asociación Empresarial A Pasaxe, Javier Díaz, destacou que o feito de carecer de licenza de actividade no polígono “dificulta enormemente a consecución de grandes contratos internacionais e mesmo programas de apoios públicos”, onde este é un “requisito indispensable”.

“Estamos a perder competitividade e a posibilidade de pechar novos contratos que levan carrexada carga de traballo e empregos. Confiamos en que todas as administracións implicadas poidan dar o empuxón definitivo a esta reclamación histórica do polígono antes do mes de agosto”, engadiu.

Pola súa banda, o secretario xeral de Asime, Enrique Mallón, lembrou que o polígono é de “vital importancia” para o sector industrial galego. “Estamos a falar de máis de 70 empresas que teñen un compromiso firme co emprego e que, de non poder regularizar a súa situación, veríanse abocadas a deslocalizarse a outros polígonos ou mesmo a outras rexións“, lamentou.

“É algo que non podemos permitir, e confiamos en que todas as administracións das que depende esta regularización poidan actuar o máis axiña posible para que os traballadores poidan irse de vacacións en agosto sabendo que as súas empresas teñen as garantías necesarias para a continuación da súa actividade”, sentenciou.

O proceso de regularización do polígono atópase xa licitado, á espera do visto e prace definitivo por parte das administracións. Os empresarios levan tres meses á espera dese desbloqueo final, que consideran “crucial para o futuro da comarca e o seu desenvolvemento empresarial”.

ÚLTIMAS

Detido en República Dominicana un home condenado por violar e gravar a unha moza en Vigo tras fuxir de España

A Policía Nacional de República Dominicana detivo nas últimas horas a Miguel Ángel Wilson, de...

Traballadoras de Protección e Reforma de Menores concéntranse ante a delegación da Xunta para reclamar condicións laborais dignas

Traballadoras do servizo de Protección e Reforma de Menores concentráronse este martes, convocadas polo...

Renuncia por motivos de saúde o concelleiro de Educación, Deportes e Mocidade de Redondela, Iván Valles

O concelleiro socialista do Concello de Redondela, Iván Valles, presentou a renuncia ao seu cargo...

Sogama acusa a Caballero de mentir sobre a subida do canon do lixo

O presidente de Sogama, Javier Domínguez Liño, acusou este luns ao alcalde de Vigo,...