A Axencia de Protección da Legalidade Urbanística (APLU), dependente da Consellería de Medio Ambiente, Territorio e Vivenda, iniciou actuacións para esclarecer unha denuncia acerca dunha posible infracción por parte do Concello de Vigo nas obras de remodelación que se están levando nas instalacións da antiga depuradora de Coruxo, para habilitalas como parque de bombeiros provisional.

Así, a APLU recibiu unha denuncia que sinala que esas obras, que se realizan nunha parcela de titularidade municipal pero que está en dominio público marítimo-terrestre, se realizan sen a autorización da administración competente, neste caso, a Dirección Xeral da Costa e o Mar.

Por iso, dirixiuse ao Concello de Vigo para solicitar información respecto desas obras, que foron adxudicadas por medio dun contrato menor, por 48.300 euros. A través dun escrito con data do 5 de maio, a APLU reclama información sobre “a existencia de título habilitante de natureza urbanística que ampare as obras obxecto de investigación”.

Fontes municipais sinalaron que o Concello non ten constancia dese requirimento, e apuntaron que esas obras consisten na adaptación dun espazo para acoller aos bombeiros que actualmente están nos baixos do estadio de Balaídos. Trátase dunha solución provisional ata que se constrúa o novo parque de bombeiros nunha nave da rúa Esturáns, onde se investirá ao redor dun millón de euros.