O alcalde de Vigo, Abel Caballero, celebrou que o Consello de Ministros dese luz verde este martes á adenda ao convenio asinado co Concello e a Xunta para o cofinanciamento das obras dos accesos á nova estación intermodal.

Caballero lembrou que el mesmo asegurou que esta autorización “estaba garantida” e criticou que a Xunta “o puxese en dúbida”. Así, volveu remarcar que o Goberno central asumirá case o 70% do custo das obras dos accesos, que mediante a adenda ascende a 21,4 millóns de euros.

Nesta liña, recalcou que a adenda permite ampliar a acción pública na contorna da estación de Urzáiz e, así, eliminar o paso elevado da rúa Lepanto, reconstruír a antiga fachada da terminal sobre o muro e humanizar a zona para integrar os novos accesos e o centro Vialia.

En virtude da ampliación do convenio, tamén se adecuarán e humanizarán a zona situada entre a AP-9 e a futura estación de autobuses e o núcleo de comunicacións desta, ademais de remodelarse a Praza da Estación, unha actuación que licitará e executará o Concello.

Mediante o acordo, o rexedor apuntou que o Concello licitará e executará os accesos, o túnel de Lepanto, a conexión da AP-9 co centro Vialia e a terminal de autobuses, a entrada e a saída da autoestrada e as instalacións e balizamentos.

Abel Caballero sinalou así mesmo que a transformación da contorna da estación Urzáiz contará con dous ascensores cuxo custo asumirá o Concello. Así, conectarán Serafín Avendaño co centro Vialia e a Praza da Estación coa intersección de Urzáiz e Vía Norte.