O alcalde de Vigo, Abel Caballero, avanzou que as pernoctas rexistradas na cidade en agosto incrementáronse un 8,5 por cento en relación ao mesmo período do ano anterior e supuxeron un total de 122.600.

En rolda de prensa, detallou que, de acordo cos datos facilitados polo Instituto Nacional de Estatística (INE), o de 2019 foi o agosto que acumulou unhas maiores cifras de pernoctas “desde que hai rexistros”. Esta situación, ao seu xuízo, supón que Vigo se converteu nun “destino turístico referencial en España”.

Así mesmo, indicou que, no que vai de ano, a cidade olívica acumulou 629.000 pernoctas, o que supuxo un aumento dun 12,3 por cento respecto ao mesmo período de 2018, un ano que, na súa opinión, “xa fora bo”.

Ademais, concretou que a maior subida acumulada foi a relativa a pernoctas realizadas por turistas españois, que se elevou un 20 por cento. Caballero atribúe este incremento á campaña impulsada a nivel nacional polo Concello olívico. Mentres, considerou que as accións realizadas a nivel internacional pola Xunta “non tiveron tanto éxito”. O rexedor olívico tamén apuntou que a taxa de ocupación hoteleira en Vigo incrementouse nun 11,5 por cento en relación ao ano anterior.

Ante esta situación, Abel Caballero constatou que estes datos “avalan” a xestión realizada polo goberno local. Así, asegurou que o aumento da afluencia turística foi impulsado a través da instalación da iluminación do Nadal, do que, segundo reprobou, o presidente do Goberno galego, Alberto Núñez Feijóo, “riu”.