Stellantis propuxo aplicar un expediente de regulación de emprego (ERE) para 175 traballadores da súa planta de Villaverde, en Madrid, tras revisar á baixa as súas previsións de produción e ante a caída da carga de traballo prevista para os próximos anos. Así o confirmaron tanto a compañía como os sindicatos a Europa Press. A empresa prevé abrir un plan de baixas voluntarias ou pactadas cos seus empregados. Segundo fontes sindicais, a partir deste venres o grupo ofrecerá de maneira concreta as condicións do proceso ao comité de empresa e ás organizacións sindicais.
UN ERTE CON 89 SAÍDAS LABORAIS ATA FINAIS DE ANO
Ademais do ERE, a compañía prevé 89 saídas laborais entre o vindeiro mes de agosto e finais deste ano no marco dun expediente de regulación temporal de emprego (ERTE), debido á redución da produción na planta madrileña. A medida responde ao axuste de actividade previsto en Villaverde, unha factoría de menor tamaño dentro da estrutura industrial de Stellantis en España.
OS SINDICATOS VEN GARANTIDO O FUTURO DA PLANTA
Con todo, os sindicatos aseguran que o futuro da planta madrileña está garantido. Lembran que o pasado mes de maio o grupo de orixe franco-italiana anunciou o traspaso da planta á filial española da marca Leapmotor, coa que Stellantis mantén unha joint venture desde 2024. Ese movemento irá acompañado da asignación de dous modelos D-SUV, cuxa configuración se fará na sede madrileña seguindo os requisitos “made in Europe”.
UGT: “O FUTURO ESTÁ GARANTIDO”
O secretario xeral da Federación de Industria, Construción e Agro da UGT (FICA UGT), Mariano Hoya, mostrouse “tranquilo” ante a presentación deste ERE. “O futuro está garantido”, afirmou este xoves ante os medios de comunicación tras visitar a factoría viguesa de Stellantis. Hoya recoñeceu que a planta de Madrid é “pequena” e que “sempre tivo dificultades”, aínda que insistiu en que a situación actual non é comparable coa incerteza que existía hai un ano.
“Se mo preguntasen hai un ano, diríache que estaba enormemente preocupado. Hoxe non. Teño a tranquilidade de que o futuro de Stellantis Madrid está garantido”, sinalou. Con todo, apuntou que será necesario chegar a un acordo para aplicar un expediente de regulación temporal de emprego durante un período determinado co obxectivo de manter os postos de traballo.
SEN IMPACTO NA PLANTA DE VIGO
A reestruturación formulada en Madrid non terá repercusión sobre a planta de Stellantis Vigo, un dos principais centros produtivos do grupo en España e unha das fábricas máis importantes do consorcio automobilístico en Europa. A factoría viguesa mantén os seus plans industriais e os seus niveis de actividade, á marxe do axuste previsto na planta de Villaverde.
