A dirección da factoría viguesa da multinacional automobilística Stellantis e os sindicatos aprobaron finalmente este mércores o acordo do expediente de regulación de emprego (ERE), que recolle un máximo de 80 saídas incentivadas ata o 18 de decembro. Segundo fontes da empresa, desta maneira ponse fin ao período de consultas iniciado o pasado 24 de marzo e redúcese de 90 a 80 o máximo de saídas finalmente acordadas. O documento contou co visto e prace de 9 dos 10 membros da parte social (SIT-FSI, UGT e CC.OO.) e estará vixente desde o 27 de abril ata o 18 de decembro.

O ERE recolle ata 80 despedimentos que, para se produciren, deberán contar cunha “dobre voluntariedade” entre as partes. Estas saídas poderán afectar tanto ao persoal mensual como ao persoal por horas. O pacto inclúe unha indemnización calculada segundo os criterios recollidos no Estatuto dos Traballadores para os empregados menores de 59 anos, así como indemnizacións máximas de ata tres veces o salario anual bruto para os traballadores de 59 anos; de 2,5 salarios anuais brutos para os de 60 anos; de 2 para os de 61; e de 1 para os de 62 anos, do mesmo xeito que en anteriores ERE en Stellantis Vigo.

Pola súa banda, existe a posibilidade de extinción con dereito de retorno preferente, con opción de reincorporación aos 36 meses e cunha indemnización equivalente a 1,25 anualidades do salario anual bruto. “En resposta á petición da parte social tamén se incluíu como medida de acompañamento a posibilidade de suspensión do contrato con dereito de retorno para traballar noutra empresa ou nun proxecto persoal durante 12 ou 24 meses”, apuntan as mesmas fontes. Así mesmo, para a execución deste acordo constituíuse unha comisión paritaria de seguimento integrada polas partes asinantes.