A CIG volveu a denunciar un peche do parque de bombeiros de Coruxo, en Vigo, marcando así unha nova “marca” ao permanecer inactivo durante 72 horas por “falta de persoal”. Segundo sinalou a organización sindical nun comunicado, desde as 22.00 horas do pasado xoves ata as 22.00 horas deste domingo o parque de Coruxo estivo pechado.
Para a CIG, o goberno local e o alcalde, Abel Caballero, pasarán á historia pola “dubidosa honra” de ter o parque de Coruxo pechado durante 72 horas por falta de bombeiros e por “incumprir de maneira reiterada os mínimos aprobados pola propia corporación municipal para a prestación do servizo”.
Por iso, fixo un chamamento ao rexedor, “que dedica tanto tempo e enerxía a eventos de proxección mediática”, para que resolva o problema de persoal que existe, ao seu xuízo, no servizo de bombeiros de Vigo para que “deixe de xogar coa seguridade dos cidadáns e dos propios integrantes do servizo”.
O sindicado insistiu en que o goberno municipal “non está a abordar coa dilixencia necesaria a precaria situación na que se atopa o servizo de extinción de incendios” e lembrou que as bases da oferta de emprego dos anos 2020, 2021 e 2022 continúan “á espera de ser publicadas”.
