A Xunta licita por máis de 875.000 euros as obras de construción do aparcadoiro disuasorio para o fomento do vehículo compartido, asociado á implantación de zonas de baixas emisións, na estrada autonómica PO-551, en Domaio, no Concello de Moaña (Pontevedra).

Así, este martes recóllese na Plataforma de Contratos Públicos da Xunta o inicio da contratación do primeiro dos aparcadoiros disuasorios proxectados pola Xunta no Morrazo, co obxectivo de mellorar a mobilidade entre os núcleos desta comarca e as áreas de Vigo e Pontevedra.

As empresas interesadas teñen de prazo ata o próximo 17 de abril para presentar as súas ofertas, sendo o obxectivo comezar os traballos no verán, segundo indicou o Goberno galego nun comunicado.

Este aparcadoiro contará cun total de 75 prazas, dúas delas para vehículos conducidos por persoas con mobilidade reducida e tres puntos de recarga para vehículos eléctricos.