Un escalador resultou ferido de gravidade este domingo tras sufrir unha caída duns 12 metros de altura no monte do Galiñeiro, no municipio pontevedrés de Gondomar. O home tivo que ser evacuado en helicóptero ao hospital debido á importancia das lesións e ás dificultades para retiralo da zona na que se atopaba.

O operativo de rescate foi realizado polo helicóptero Pesca II, pertencente a Gardacostas de Galicia, logo de que os equipos de emerxencias desprazados ao lugar solicitasen a súa intervención. Inicialmente, os bombeiros valoraran trasladar o ferido a pé mediante a técnica do porteo, pero finalmente optouse pola evacuación aérea ante o estado no que se atopaba.

O 112 recibiu o aviso arredor das 12.00 horas, a través da chamada dun particular. Segundo a información facilitada nese primeiro momento, o escalador estaba inconsciente e situado nun punto de difícil acceso, o que obrigou a mobilizar un amplo dispositivo de emerxencias.

Tras recibir a alerta, a central autonómica deu aviso ao 061, aos Bombeiros do Morrazo, ao GES de Val Miñor, á Garda Civil e a Protección Civil de Val Miñor, que participaron no operativo.

Fontes dos servizos de emerxencias explicaron que, segundo as primeiras informacións recollidas no lugar, o accidente puido producirse cando o escalador non realizou correctamente o nó da corda. Ao iniciar o descenso, o home precipitouse e caeu sobre o seu compañeiro, que nese momento estaba asegurándoo.

A gravidade das lesións que presentaba o ferido levou os efectivos a pedir a intervención do helicóptero de rescate de Gardacostas. Finalmente, o Pesca II evacuou o escalador ata un centro hospitalario para que recibise atención médica.