O Celta confirmou este luns que se ve “obrigado” a reincorporar aos seus adestramentos ao dianteiro Santi Mina, que estaba apartado da disciplina do club desde principios do pasado mes de abril tras ser condenado a catro anos de cárcere por abuso sexual.
“O RC Celta recibiu nas últimas horas unha comunicación oficial relacionada coa situación do xogador Santiago Mina. A través dun burofax esixe a súa incorporación inmediata aos adestramentos do equipo, polo que neste caso o club vese obrigado a asumir a presenza do xogador desde este momento nas sesións de preparación dentro dos horarios estipulados cos seus compañeiros”, sinalou o club.
O conxunto vigués non especifica os motivos que lle obrigan a esta readmisión, pero segundo o avogado laboralista Fabián Valero, en declaracións a ‘La Voz de Galicia’, débese a que non rescindiu o contrato do dianteiro, en vigor ata 2024, cando debía facelo e agora este alega ‘falta de ocupación efectiva’.
“O RC Celta reservase o seu dereito de reclamar, se a sentenza devén firme, todos os danos e prexuízos ocasionados polo comportamento do xogador á entidade tanto económicos como de imaxe do club, respectando a día de hoxe o seu dereito a recurso”, engadiu o equipo que preside Carlos Mouriño.
Ademais, a entidade celeste destacou que o atacante, “dada a situación xudicial que xerou e que dana a imaxe deste club, rexeitou unha oferta para xogar nun equipo doutra liga“, e asegurou que “nunca se deixará presionar por ningún traballador que busque os seus intereses particulares”, mostrando a súa “sorpresa por este movemento do xogador encamiñado a danar ao RC Celta, que desde a sentenza xudicial obrou conforme aos valores deste club e da súa afección e aos que non renunciará baixo ningún concepto”.
