O alcalde de Vigo, Abel Caballero, valorou o ofrecemento de colaboración da Real Federación Española de Fútbol (RFEF) para “ir xuntos” e lograr que a cidade sexa unha das sedes españolas do Mundial 2030, aínda que advertiu de que “ten que ser rápido”, e matizou que o Concello mantén aberta a vía xudicial para defender a candidatura olívica, excluída tras a modificación das puntuacións na selección de cidades aspirantes.

Nunha rolda de prensa, o rexedor reiterou que, tras constatar a “vontade” da RFEF para apoiar a candidatura viguesa, o Concello acepta esa colaboración, pero advertiu de que non vai esperar ” dous anos”. “Ten que ser rápido”, incidiu, á vez que lembrou que, en todo caso, Vigo está a facer os seus deberes e encargou xa as obras para a renovación de dous colectores situados fronte á bancada de Tribuna, unha actuación necesaria para acometer daquela a reforma e chegar ao aforamento de 44.000 persoas no estadio municipal.

Abel Caballero sinalou que os propios responsables da RFEF admitiron, na reunión mantida nas únicas horas, que “ninguén está excluído” e que a decisión dependerá, se non hai máis remedio, da FIFA. Con todo, o alcalde incidiu en que segue aberto a porta da vía xudicial. “Non descartamos nada”, repetiu, e proclamou: “Imos defender a Vigo ata as últimas consecuencias. A pesar de que o PP está en contra de que Vigo sexa sede do Mundial, e de que o BNG está en contra de Vigo sexa sede do Mundial”.

CONFIDENCIALIDADE

Por outra banda, Caballero reiterou o seu desacordo cos argumentos esgrimidos polos responsables federativos, especialmente no que respecta á obrigación de confidencialidade, e repetiu que se lle esixiu asinar un acordo de confidencialidade para coñecer as puntuacións da candidatura da cidade de Vigo . “A miña”, ironizou o rexedor.

Ademais, lembrou que a propia FIFA fixo públicas as puntuacións e consideracións relativas ás 11 sedes seleccionadas. “Onde está a confidencialidade?”, preguntou e asegurou que, ante esta cuestión, os membros da RFEF “gardaron silencio” no encontro das últimas horas.

O PP CELEBRA A DECISIÓN

O PP de Vigo celebrou o “xiro” na actitude do alcalde, Abel Caballero, con respecto á polémica coa Real Federación Española de Fútbol (RFEF) pola exclusión da cidade como sede do Mundial 2030, e pediu ao rexedor que manteña unha actitude colaboradora porque “as rifas que estaba a montar non servían para nada”.

Nun comunicado remitido aos medios, a presidenta dos ‘populares’ vigueses, Luisa Sánchez, trasladou a súa satisfacción porque o alcalde abrira unha vía de colaboración coa RFEF, algo que non exime ao organismo presidido por Rafael Louzán de facer pública a información sobre os baremos e puntuacións na selección de sedes.