A Xunta desvelou este xoves que a solicitude para facer concertos no estadio municipal de Balaídos foi remitida polo Real Club Celta ao Concello (propietario do campo), e a entidade deportiva limítase a pedir autorización para concertos e eventos con motivo do seu centenario, e que se celebrarían entre o segundo semestre de 2022 e o ano 2023, en que o club cumpre o seu primeiro século.

Na solicitude, o Celta non expón que os eventos a realizar teñan vinculación co Xacobeo, nin sequera que puidese haber un patrocinio futuro, e limítase a pedir “autorización explicíta” para concertos e eventos multitudinarios, debido ao interese dunha “elevadísima porcentaxe do celtismo” e dentro das celebracións do seu centenario.

A delegada da Xunta en Vigo, Marta Fernández-Tapias afirmou nas últimas horas que o Goberno galego pechou a contratación da banda británica Muse e que a súa intención é que o grupo actúe na cidade. O único recinto que reúne as características para o concerto sería o estadio municipal, pero Fernández-Tapias lamentou que o “veto” do alcalde imposibilitaba que se faga o evento en Vigo.

O rexedor reiterou este xoves que o Concello non recibiu petición algunha relacionada cun concerto de Muse en Balaídos nin por parte da Xunta, nin da organización do Xacobeo nin de ningunha empresa promotora. “Se non o pediron, é que nunca tiveron previsto facelo”, denunciou.

Así mesmo, o goberno local nun comunicado si se refire a a solicitude do Real Club Celta, pero incide en que a entidade “tan só alude á celebración do seu centenario, co que o Concello quere cooperar, como sempre fixo”.

O alcalde, Abel Caballero, acusou a delegada da Xunta de mentir, e advertiu de que, en política, iso é “moi grave”. Na mesma liña, o comunicado remitido aos medios conclúe que “a Xunta xa decidiu levar ese concerto a outra cidade”.

“BALAÍDOS COMO PRIMEIRA OPCIÓN”

Pola súa banda, a delegada da Xunta repetiu este xoves que xa había un acordo coa promotora de Muse para realizar o concerto e que é a negativa do goberno local a que fai inviable que a actuación sexa en Vigo. Respecto diso, fontes autonómicas lembraron que xa hai semanas que o alcalde afirmou que non quería concertos do Xacobeo na cidade, e mesmo nos últimos días, antes de facerse público o nome do grupo, Caballero descartou o uso de Balaídos polas obras de reforma ou do auditorio de Castrelos.

A Xunta explicou que, a mediados de marzo, se iniciaron contactos coa promotora de concertos de Muse “con Balaídos como primeira opción” e Riazor como segunda. Días despois, a empresa fala co Celta, entidade que usa o campo en exclusiva, “para coñecer as posibilidades e características” do estadio municipal.

A principios de abril, a entidade celeste remite ao Concello a súa petición de que se lles autorice a organizar concertos multitudinarios vinculados ao seu centenario, “sen que se obtivese resposta algunha ata agora”.

O pasado martes, e despois de que o rexedor avanzase a súa negativa á realización de concertos en Balaídos, a promotora descarta a actuación en Vigo e así llo comunica á Xunta, segundo fontes autonómicas, que sinalaron que si haberá actuacións musicais, aínda que serán noutro formato, en terreo portuario.

Marta Fernández-Tapias censurou a “estratexia de bloquear calquera actuación do Executivo autonómico” por parte do goberno vigués, o que contrasta con outras cidades, como A Coruña, onde a súa alcaldesa (tamén socialista) “ofreceuse desde o minuto 1 a falar coa Xunta e chegar a un acordo”. “O resultado é que Rosalía actuará no Coliseum nun concerto patrocinado polo Concello, a través do Consorcio de Turismo, e a Xunta, a través do Xacobeo”.

Muse non actuará en Vigo este verán ante a guerra entre Concello e Xunta